賓菲加領隊KK NGAN - 08-05-2016 第二屆寶源盃PES Winning 大
第二屆寶源盃PES Winning Eleven,多位友聯人參賽,經過3及4月份响街鋪或網對戰多場初賽之後,最後有23友聯人或親友晉身決賽,當中包括兩位願意由澳門過大海到香港比賽嘅友聯人。另外仲有父子兵添,史篤城領隊Kalok嘅爸爸都殺入決賽。為咗激勵士氣,友聯主席蕉民更加出提獎金贊助添,冠軍可以額外獲得港幣500現金,亞軍亦可獲友聯會籍一年。
以下為23位代表名單:
1. 深喉拍枱皇 C+ (阿積士)
2. Kalon (羅連安特)
3. Boo (西布朗)
4. 圖豬三兄弟 (圖魯茲)
5. 榮總 (布里斯班獅吼)
6. Kalok (史篤城)
7. Arvin (切爾達)
8. Very (加拉塔沙雷)
9. 92 (國際體育會)
10. Lung (馬略卡)
11. 細魔 (南特)
12. Mk (華倫西亞)
13. Andrew (大阪飛腳)
14. 花王 (飛燕諾
15. 性鬥士閪毛波教頭 (精英)
16. Crey (柏雷素爾)
17. 7lu (哥連泰斯)
18. Kalok 爸
19. 根 (車路士)
20. Kalo (皇家馬德里)
21. Alex (歐塞爾)
22. samuelmaa (威廉二世)
23. DiEaMen (朗斯)

決賽日於5月8日响屯門VCity舉行,名額只有40人,雖然有兩位友聯人因事,最終冇出席,但友聯代表已經佔咗一半,而當中唔少參賽者以往都有參加比賽,或者係友聯代表嘅朋友。基本上有近30人係本身係識得或熟口熟面。事實上,經歷過2014及2015兩集,PES Winning嘅玩家銳減,到今集先至多返唔少玩家。據非正式估計,現時本地PES Winning玩家可能唔超過1000人,再加上會參加比賽嚟嚟去去都係個班人。
講返決賽日當,由於比賽為一場過進行,經抽簽後,出現唔少自己人打自己人嘅情況。最慘仲要响第一輪就出現咗兩位超聯級領隊C+同圖豬嘅大戰,兩人响友聯嘅最高組別超級聯賽嘅強手,近5屆冠軍,佢哋兩位各贏兩次,所以可以話係提前嘅決賽戲碼,好可惜兩個只能活一個,最終鬥到互射12碼,由C+晉級。其中代表之一嘅very更加場場對住自己人添;另外,lulu响互射12碼情況下,先後將兩位熱門兼前冠軍神童同Magic淘汰出局。

經過上午好幾輪淘汰賽之後,最後產生四強,而且由友聯代表全部包辦晒,分別係:C+、Kalok、lulu、同Very(Barry)。

四強對賽,先由C+大戰Very,C+用拜仁慕尼黑,而Very用皇家馬德里。比賽初段C+佔優,並且能夠先開,但中段有啲亂,突然比Very連入3球,雖然C+尾段追返1球,但為時已晚,大熱門以2:3落敗;
另一場由Kalok對Lulu,兩人同樣用拜仁慕尼黑,但踢法各有千秋,lulu以葛斯個人盤扭帶動全隊,而kalok以整體配合快速反擊,兩人入波梅花間竹,打成2:2,當大家以為比賽要加時之際,kalok攻入致勝一球,絕殺lulu。

季軍賽,由C+對lulu,兩位帶失落嘅心情進行比賽,結果戰情有啲膠著,最終C+攻入全場唯一入球,以1:0成為賽事季軍。

到決賽,由Kalok大戰Very,Kalok繼續用拜仁,Very亦照用皇馬,開波冇耐就由拜仁嘅洛賓先開紀錄,Kalok領先1:0,之後皇馬由丹尼路响右邊出波,C朗頂中眉,由後上嘅賓斯馬追返1:1,上半場尾段,拜仁由湯馬士梅拿硬爆入禁區,再射成2:1,亦以呢個比賽完成上半場;
下半場初段,皇馬由C朗交出一個靚直線,賓斯馬成半單刀狀態,係紐亞衝出禁區前再推橫再射入,追成2:2;去到下半場大約64分鐘,皇馬由C朗直線交右路,巴爾快放落底,用左腳腳面傳中,再由賓斯馬射近柱入網,反超前3:2;去到大約74分鐘,拜仁嘅查維馬天尼斯响中場帶波,再突然交出個一腳直線,令到洛賓成單刀情況,趁拿華斯出迎時,笠射得手,追成3:3;當大家又為好大機會加時之際,剛踢入90分鐘補時,占士洛迪古斯個靚直線傳入禁區頂,巴爾快紐亞一步推橫,再起腳射,而拜仁艾拿巴慢一步,護唔到空門,最終皇馬射入,4:3,Very就以呢個比數擊敗kalok,成為今次賽事嘅冠軍。

恭喜晒Very!Kalok嘅表現都好出色,只可惜功虧一簣。
而Very仲會代香港前往意大利嘅米蘭,响5月28日,歐聯決賽當日同嚟自世界各地嘅高手過招,爭取成為世界總冠軍,除咗有1萬5千歐羅獎金之外,仲可以即晚入場睇埋歐聯賽添。而令次賽事各友聯人都相當湧躍參與,大家繼續努力練波,下屆賽事要繼續參賽!
[2016--0-5- 10: 1:6:]